老人科門診, 總是非常擁擠。老友記病友多, 醫生少, 是政府醫院的常態。
五時了, 枱上只剩下一個舊症和一個新症。今天的進度尚算不錯。
一位老友記坐在輪椅上, 由她的女兒緩緩推進門診。
看看面前的牌板, 面前的叔叔己經 103 歲了! 百歲老人在現今香港, 絕非稀奇事。
「叔叔, 你叫乜野名呀? 」我腑身向前對叔叔說。
叔叔望着我, 露出一絲笑容, 卻不發一言。
「佢唔睬人好耐囉, 淨係好耐唔耐講啲唔知佢講乜嘅嘢, 佢都腦退化咗好多年。」女兒見爸爸對我不瞅不睬, 解釋說。
翻查紀錄, 叔叔與家人同住, 有血壓高、心臟病和認知障礙問題, 一直在老人科門診覆診。
「佢有乜特別唔舒服? 」我轉身問女兒。
「都無乜野, 係唔講嘢囉。佢胃口幾好, 又瞓得, 係屋企扶住個架行到去厠所㗎! 」女兒一邊說着,一邊面露笑容。
「咁好叻喎! 」103 歲了! 雖然認知障礙令他溝通困難, 但卻仍然保持一定的活動能力, 實在算是不錯。
「係呀, 我老竇真係算係咁啦, 我地好滿意㗎啦。」女兒一臉欣慰。
「照顧有無問題? 」我再問。
「都無乜問題, 一路都係我地照顧。」
「咁叔叔好幸福喎! 」試想想, 活到103 歲, 仍然能安居在自己家中, 得到家人照顧, 自己又可以維持基本行動能力, 你說多好!
「自己呀爸, 緊係要做㗎啦。」女兒說。
檢查過後, 藥單也打好, 女兒準備跟爸爸離開, 突然她忍唔住對我說:
「唉吔, 醫生, 你知唔知呀, 有時都好激氣㗎。有時一個唔覺, 佢瞓係床度疴尿, 攪到成床都係, 執到我地死呀。話極佢都唔會有用, 激鬼死我呀!」
「係呀, 有時係麻煩啲㗎啦, 叔叔已經好叻, 你地又已經照顧得好好。不過啱嘅, 有野係要呻㗎, 唔好收收埋埋, 一定要同人講呀。。。」我回應。
全天候照顧一個 103歲的老友記, 怎會沒有壓力? 怎會事事順利, 沒有任何問題發生? 就算怎樣有耐心和孝心, 也難免有沮喪的時候。與同路人分享, 就是分擔彼此壓力的最佳方法。參加醫院或社福機構的互助小組, 相信會對照顧者有非常實在的支援。
Search